Unser Hochzeits-Blog

Claudine’s Nachtgebet in der Hochzeitsnacht

Liebe Gott guet Nacht guet Nacht
Du hesch mich huet zur Ehefrau gmacht
Dr Emanuel isch jetzt mi Ma
Do wird ich lang dra z’gnage ha
Nit eifach für mich als Frau
Er nimmt doch alles viel z’genau
Alles god bi ihm nach Plan
Das gränzt scho fascht a Rinderwahn
ich gang in d’Schtadt zem Hoose chaufe
er darf mit mir dur d’Lääde laufe
dänn mach ich ungeplant as Schtöppli
und chauf statt Hoose mir es Töppli
denn chan er das nur müesam glaube
er luegt mich a mit grossen Auge,
ratlos, sprachlos, und verschtört
das sind kei Hoose, s’sch es Shirt.
Sehr guet min Schatz, Du hesch’s erfasst
Es isch es Töppli wo mir passt.
Das kauf’ ich mir, und jetz muesch loose
ungeplant, aschtell vo Hoose.

Sin Tag isch plant vo frueh bis schpat
Schritt für Schritt ganz akkurat.
Kauft er sich es Päärli Sogge,
Underhose, Fruehschtücksflogge
Joghurt, Joghurt, Teflonpfanne,
Gartenschlauch und Badewanne,
denn liest er zerscht, d’Geduld isch riesig
sehr genau d’Gebruchsawiisig,
d’Zaemesetzig, s’Material,
Punkt für Punkt, es isch a Qual
Und alles was das mändlig Wäse
in d’Händ bikunnt, das wird au glääse.
S’isch Hochzytsnacht, juhee, juhee
Ich wart’ uf ihn im Negligée
Doch de dänkt gar nid amourös
Er rännt verzwiflet und nervös
ohni jede Liebesdrang
dur Zimmer, Stube, WC, Gang
Er sucht scho lang, sin Schtress isch riesig 
er find für mich kei Gebruchsawiisig

Emanuel’s Nachtgebet in der Hochzeitsnacht

Lieber Herr es isch vollbracht
Jetzt ghört sie mir, ab dere Nacht
In dere Ehe trag ich denn d’Hoose
Ich fiere s’Gschpraech und sie muess loose
Doch frog’ ich mich vo frueh bis schpoot:
„Was mach’ ich nur mit dem krative Chaot?“
Die hed kei Schimmer ohnehin
vo Ornig und vo Disziplin
und leider hed sie au kei Ahnig
vom Nutze vonere guete Planig
Do seid sie klar, und ich tue loose
„Mir gön i d’Schatdt, ich bruuche Hoose“
ich gang drum mit zem Hoose chaufe
darf hindeno dur d’Lääde laufe
dänn macht sie ungeplant as Schtöppli
und chauft statt Hoose grad es Töppli.
Ich bi perplex, das goht doch nid
Das isch e grossen Unterschied.
Jede weiss, es Top isch obe
Und Hoose gön fascht bis an Boode.
Das isch e klars Problem für mich
Doch ihre isch das total glich.

S’schlimmschti isch, sie tued mer saage
Was d’Kleider sind, won’ ich sott traage
Bevor ich han min Honey troffe
Bin ich ganz andersch ume g’loffe
Ralph Lauren, Polo und Banana
Hämp mit Logo und Pyjama
Das sig uncool, het sie gseit
Das wird sofort nümmi treit
Abercrombie Fitch muesch chaufe
Wenn du mit mir wotsch umelaufe
Und sie hed rächt, de gueti Schatz
Ich has gläse ide BAZ
Ich bi jetzt wiemer das so nennt
Modisch absolut im Trend

Was mi närvt und zwar ganz riesig
Claudine liest kei Gebruuchsawiisig
Sie chauft sich Pulli, T-Shirt, Sogge,
Underhose, Fruehschtücksflogge

Sie wurdi niemals Zyt verliere
und d’Ettikette guet studiere
Ich lies’ halt alles Wort für Wort
D’Zämesetzig, Teschtrapport
Bipackzättel, Waschvorschrift
Was für Zusätz, wieviel Gift.

Ich weiss fascht alles, plan’ perfekt
damit nie öppis abverreckt
Für d’Hochzigsnacht als brave Ma
Han ich sie plant im Pyjama
Mich hanich gseh im Polo Shirt
Jetz isch de Plan au scho zerstört
Jetz sitzt sie doch herjemine
Scho ufem Bett im Negligee
O Gott jetz wird mir  total heiss
Jetzt han i Angscht und chalte Schweiss
Liebe Gott ich schtoh im Schilf
diesmol bruch I wirgligg Hilf
ich verschtoh sie nid die Frauewäse
ich nuess jetz zersch no en Gebruchsaleitig läse.